NAIBU WAZIRI WA MAJI MHE.AWESO ASIMAMISHA ZIARA YAKE KUSIKILIZA KERO ZA WANANCHI.

Imewekwa: August 24th, 2019

Naibu Waziri wa maji Mh. Juma Aweso amelazimika kusimamisha ziara yake  kwa muda mfupi kusikiliza  kero za wananchi wa Kijiji cha Oldonyongiro Wilayani Arumeru kuhusiana na maji ili hali kuna mradi wa maji wa MAKILENGA  unaohudumia vijiji 22 kikiwemo kijiji hicho.

Wakitoa malalamiko yao juu ya upatikanaji wa maji Kijijini hapo wananchi hao wamelaani kitendo cha kufungiwa maji na wananchi wenzao wa ukanda wa juu ambapo ndipo mradi unapo anzia ilihali wapo tayari kuchangia gharama za maji.”Kinamama tunateseka tunatumia muda mwingi kufuata maji  kwa sababu ya kubaguliwa kwa kufungiwa Maji na watu wa Kata ya Leguruki  wanaotumia maji ya bomba kumwagilia”alisema Mwaija Omari.

Mwananchi mwingine alijitambulisha kwa jina la  Matayo, amesema uongozi wa bodi ya Maji MAKILENGA  umekua ni kikwazo kwani badala ya kutatua changamoto wameendelea kupewa maji kwa mgao ambapo wanaweza  kukosa huduma ya maji kwa zaidi ya siku 3.  

Aidha Mh. Aweso aliwaomba wananchi hao    kuwa wavumilivu na kuendelea na ziara yake inayolenga kutambua na kutatua changamoto za upatikanaji maji kwa kuzingatia Ilani ya Chama cha Mapinduzi (CCM) inayo elekeza ifikapo mwaka  2025 upatikanaji maji vijijini kuwa asilimia 85.

 Kufuatia malakamiko hayo Naibu huyo  ameagiza jeshi la Polisi Wilaya ya Arumeru kuwashikilia na kuwaweka chini ya ulinzi viongozi wa Bodi hiyo akiwemo mwenyekiti wa Bodi Godhope Chales,Mhasibu wa Mradi Bi.Warialanga Pallangyo,pamoja na fundi bomba anayetambulika kwa jina la Kaaya, kwa tuhuma za ubadhirifu”Serikali haitamfumbia macho yeyote atakaye fanya ubadhirifu wa miradi ya maji na imejikita kuwaletea wananchi maendeleo”amesisitiza Aweso.

Aweso amesema kwa mujibu wa Sheria no 5 ya mwaka 2019 iliyoanzisha mamlaka ya maji vijijini na Mjini RUWASA vyombo vya vya watumia  maji ikiwemo MAKILENGA vitaundwa upya hivyo hii itaboresha uongozi pia ameagiza uundaji wa tume itakayochunguza uendeshaji wa mradi huo wa MAKILENGA.

Naye Mkuu wa Wilaya hiyo Jerry Muro amesema  hakuna tatizo la Maji Kijijini hapo bali tatizo lipo kwa Wananchi wenyewe  na uongozi wa MAKILENGA kwani miradi ya maji iliyopo inauwezo wa kuhudumia vijiji vyote 22 vilivyopo kwenye Mradi hivyo ameshauri  wenyeviti wa Vijiji vyote 22  kuwa wajumbe wa bodi  ili waweze kusimamia  upatikanaji wa maji kwenye vijiji vyao.

Kwa upande wake Meneja wa Wakala  wa Maji  Vijijini Wialaya ya Arumeru  mhandisi Christine Kessy amesema kwa mujibu wa Sheria  ya Maji no 12 ya mwaka 2009 inaelekeza kuwa, Maji ni rasilimali ya taifa  na yanatakiwa yalindwe hivyo hakuna mwananchi anayeruhusiwa kuzuia upatikanaji wa huduma ya Maji pia Sera ya maji ya mwaka 2002 inaelekeza  nilazima kwa wananchi wote kuchangia. 

Mhandisi Christine ameeleza  kuwa Wananchi wa Kata ya Leguruki  wamechangia mradi huo kutokufanya vizuri kwani wanatumia maji ya bomba hovyo  kumwagilia migomba na kahawa pia  hawachangii huduma ya maji.

Ziara ya Mhe.Naibu Waziri wa Maji imekamilika kwa kuzungumza na wananchi kwenye mkutano wa hadhara, ambapo Mhe.Mbunge wa Jimbo la Arumeru Mashariki DKt.John Pallangyo amewashukuru wananchi kwa kumchagua na kuahidi kuwatumikia  na kuwawakilisha vyema .

Mhe.Mbunge wa Jimbo la Arumeru Mashariki John Pallangyo akizungumza na Wananchi wa Tarafa ya King'ori.

Mhe.Mbunge wa Jimbo la Arumeru Mashariki John Pallangyo amewashukuru wananchi hao kwa kumchagua na amehaidi kuwatumikia na kuwawakilisha vyema.pia amewaomba ushirikiano.

ananchi wakimsikiliza Mhe.Mbunge.

Wananchi wakimsikiliza Mhe.Mbunge.