ZIARA YA KAMATI YA SIASA WILAYA YA MERU YAKAMILIKA SIKU YA KWANZA

Imewekwa: June 28th, 2021

Kamati ya Siasa Wilaya ya Kichama ya Meru imekamilisha ziara yake kwa siku ya kwanza ambapo imetembelea miradi ya Sekta za Afya, Elimu na Uchumi na Uzalishaji Mali.

Kamati imepongeza utekelezaji wa Ilani katika Halmashauri ya Wilaya ya Meru na kutoa Maagizo ikiwemo wataalam kuhakikisha  wanatoa elimu ya kutosha ya ujasiriamali kwa vikundi vya Wanawake, Vijana na Watu wenye ulemavu vinavyonufaika na mikopo isiyo na riba inayotolewa na Halmashauri. Kamati imetoa rai kwa Vikundi kutumia fursa hiyo kujikwamua kiuchumi.

Aidha, Vikundi vya Wanawake, Vijana na Watu wenye ulemavu vimehamasishwa kutumia mikopo  kujiletea maendeleo na kuhakikisha vinarejesha mikopo ili Wananchi wengine waweze kunufaika.

Kamati imewataka Watumishi wa Afya kuhakikisha wanatunza nyumba zilizojengwa na Serikali ili ziweze kutumika kwa muda mrefu.

Aidha, Wataalam wa ujenzi wa Halmashauri wamepewa maelekezo kuhakikisha kuwa wanafanyq ukaguzi wa mara kwa mara wa majengo yote hata yale yaliyokamilika ili kuendelea kutoa ushauri katika ukarabati na utunzaji wake.

Kamati ya Siasa imetoa Wito kwa Wataalam wa Sekta ya Afya kuwahudumia wananchi kwa weledi, kwani sekta ya Afya ni muhimu kwa maendeleo ya Taifa na kusisitiza  ushirikiano kati ya Watendaji wa Kata  na Waheshimiwa Madiwani katika kuwaletea Wananchi maendeleo

Katika siku ya kwanza Kamati ya Siasa imetembelea miradi ya  ujenzi wa chumba cha maabara katika zahanati ya Kimundo, ujenzi wa nyumba ya mtumishi katika zahanati za Mulala na Kilinga, Kumtembelea vikundi vya Wanawake  vya Tikusare na Shukuru, kukagua ujenzi wa Vyumba  vya madarasa katika Shule za Msingi Kilimani, Kikatiti na Kitefu .