ARUMERU KUTOKUZIFUMBIA MACHO ASASI ZA KIRAIA ZINAZOFANYA UDANGANYIFU

Imewekwa: June 3rd, 2023

Mkuu wa Wilaya ya Arumeru Mhe. Emmanuela Kaganda ametoa onyo kwa Mashirika yasiyo ya Kiserikali yanayofanya udanganyifu kwa kutokuweka wazi taarifa za mapato na matumizi ya fedha toka kwa wahisani, kwani hatua kali za kisheria zitachukuliwa dhidi yao.

Akizungumza  katika kikao cha jukwaa la Mashirika yasiyo ya kiserikali katika Halmashauri ya Wilaya ya Meru, Mhe. Kaganda amesema  Wilaya hiyo itafanya Msako  kubaini Mashirika  yanayofanya kazi kinyume na utaratibu na yasioleta  tija kwa jamii hivyo kukwamisha azma  ya Serikali ya kuwaletea wananchi maendeleo  kwa wakati.

Mhe.Kaganda ameyataka  mashirika yote yanayofanya  udanganyifu  ikiwa ni pamoja na ubadirifu wa fedha  za miradi  toka kwa wahisa  kuacha mara moja ambapo ameiagiza Halmashauri kufanya ufuatiliaji kujua bajeti  na shughuli shughuli zinazofanywa na mashirika hayo

" shirika linapata mamilioni ya fedha toka kwa wahisani linatekeleza mradi wenye thamani ya  asilimia  1% ya fedha" amehoji Mhe. Kaganda

Kwa upande wake Mkurugenzi  Mtendaji  wa Halmashauri  ya  Wilaya  ya  Meru Mwl.Zainabu Makwinya  amesema utambuzi wa Mashirika  yasiyo ya Kiserikali  unaendelea.Pia ameshukuru  mashirika ambayo yanayoshirikiana na Serikali katika swala zima la  maendeleo.

Kwa niaba ya Mashirika yasiyo ya Kiserikali Vicent Uhega ambaye ni Mwenyeki wa Mashirika  yasiyo  ya Kiserikali  na Mkurugenzi wa Shirika  Voice of Youth Tanzania  amesema mashirika hayo yataendelea  kushirikiana na serikali kwa uwazi na ukaribu  ili kuwaletea wananchi maendeleo.

Jukwaa hilo la Mashirika  yasiyo  ya  Kiserikali  limefanyika katika ukumbi wa Halmashauri  ya Wilaya  ya  Meru  na kujumuisha wawakilishi wa Mashirika  mbalimbali  yasiyo  ya Kiserikali  yaliyopo katika Halmashauri ya Meru.