WANAFUNZI 96 KIDATO CHA KWANZA WAPANGWA AWAMU YA PILI

Imewekwa: January 26th, 2021

Wanafunzi  96  katika Halmashauri ya Wilaya ya Meru ambao ni miongoni mwa wanafunzi 1,635 wa kidato cha kwanza  ambao hawakupangwa katika awamu ya kwanza kutokana na upungufu wa  vyumba vya madarasa,  wamepangwa katika Shule ya Sekondari Nkoarisambu baada  vyumba viwili kukamilika.

Mkurugenzi Mtendaji wa Halmashauri hiyo, Ndg.Emmanuel Mkongo amesema  Halmashauri hiyo imeanza kuwapanga wanafunzi wa kidato  cha kwanza kwa awamu ya pili, ambapo leo  wanafunzi 96  wamepangwa katika  shule ya Sekondari Nkoarisambu hivyo kutimia kwa idadi ya wanafunzi 196 waliopangwa katika shule hiyo. Ameeleza kuwa kutokana na upungufu wa vyumba 2 vya madarasa wanafunzi 100 pekee  walipangwa katika shule hiyo  kwa awamu ya kwanza.

Mkongo amesema Halmashauri hiyo itaendelea kuwapanga wanafunzi wa awamu ya pili katika shule za Sekondari zitakazo kamilisha  vyumba vya madarasa  baada ya kufanya ukaguzi na kujiridhisha. Mkongo ameendelea kutoa wito kwa Waheshimiwa Madiwani ,Wenyeviti wa Vijiji, Wenyeviti wa Vitongoji, Watendaji wa Kata na Vijiji kusimamia ukamilishaji  wa madarasa hayo kabla ya tarehe 28 Febriari 2021 kama Serikali ilivyoelekeza.

Aidha, ziara hiyo ya Ufuatiliaji na Ukaguzi wa ukamilishaji  wa vyumba vya  madarasa ilimjumuisha Mwenyekiti wa Halmashauri hiyo Mhe. Jeremia  Kishili, Mkurugenzi, Afisa elimu Sekondari na Mhandisi  wa ujenzi. Shule za Sekondari  zilizo tembelewa ni  Ngongongare,  Nkoarisambu na Shule mpya ya Sekondari Kiwawa inayotarajiwa kuanza wiki ijayo kwa kupangiwa wanafunzi ,  shule hii ni mpya ina vyumba vya 4 vya madarasa, viti na meza 100  kwaajili ya wanafunzi,  imeelekezwa kukamilisha  baadhi ya miundombinu ya maji kwa upande wa vyoo vya Ofisi ya Walimu kabla ya wiki ijayo.

Ikumbukwe, katika Halmashauri ya Wilaya ya Meru idadi ya wanafunzi 6,851 walichaguliwa kujiunga kidato cha kwanza ambapo kati yao 5,216 walipangwa kwa awamu ya kwanza na 1,635 wanasubiri kupangwa kwa awamu ya pili baada ya vyumba vya madarasa kukamilika ambapo kati yao 96 wamepangwa leo.

Katika kuhakikisha vyumba vya madarasa vinakamilika Halmashauri ya Wilaya Meru kupitia fedha za mapato yake ya ndani (Own Source) imetumia zaidi ya Shilingi Milioni 160 kununua vifaa vya ujenzi ambavyo ni Bati 1860 zilizogharimu  shilingi 48,259,004.51, Mbao shilingi 64,598,752.00 na Saruji mifuko 3325 iliyogharimu  shilingi 48,212,500.

bofya hapa Kuona orodha ya wanafunzi 96 waliopangwa.pdf

Mkutugenzi Mtendaji wa Halmashauri ya Wilaya ta Meru akiwa katika moja ya darasa katika Shule ya Sekondari Nkoarisambu.

Uongozi wakati wa Ziara katila shule ya Sekondari Kiwawa.