CHANJO YA POLIO AWAMU YA TATU YAZINDULIWA RASMI WATOTO ZAIDI ELFU 56 KUCHANJWA.

Imewekwa: September 1st, 2022

Mkuu wa Wilaya ya Arumeru, Mhandisi Richard Ruyango amezindua rasmi kampeni ya awamu ya tatu ya chanjo ya  Polio itakayofanyika kwa Siku nne kuanzia leo tarehe 01 hadi 4 Septemba 2022, ambapo  ametoa wito kwa  jamii  kuwalinda watoto dhidi ya ugonjwa Polio unaosababisha  kupooza na  ulemavu wa viungo, kwa kuhakikisha watoto wote wenye umri chini ya miaka mitano  wanapata chanjo.

Akizungumza katika uzinduzi huo uliofanyika katika hospitali ya Wilaya ya Meru (tengeru) Mhe. Ruyango  amesema  baada ya kugundulika uwepo wa ugonjwa huo nchi ya jirani ya Malawi  Serikali ya awamu ya  Sita chini ya Mhe.Rais Samia Suluhu Hassan imehakikisha chanjo zinapatikana na watoto wanakuwa salama" chanjo ya Polio ni bure ni wasihi tuwalinde watoto kwa kuwapa chanjo"amehimiza Mhe.Ruyango

Dkt.Focus Maneno ambaye ni Mkuu wa Idara ya huduma za Afya, Lishe na ustawi wa jamii amesema ugonjwa wa polio hauna tiba na  ni hatari kwani unasababisha mtoto kupooza hivyo kupata ulemavu wa viungo  na kusababisha mtoto kuwa tegemezi ambapo amehimiza wazazi na walezi kuzuia madhara ya Polio kwa kuhakikisha watoto wanapata chanjo " mtoto asiyepata chanjo ni hatari kwake na kwa jamii nzima" amehimiza Dkt.Maneno.

Naye Mratibu wa chanjo Halmashauri ya Wilaya ya Meru Salome Mbegela amesema chanjo ya polio itatolewa kwa siku nne kuanzia leo tarehe 1 hadi 4 Septemba 2022 na itatolewa nyumba kwa nyumba, vituo vya huduma za afya, vituo vya kulelea watoto, katika shule  nk

Bryson Willium ambaye ni mzazi mwenye mtoto aliyepata chanjo ametoa wito kwa wazazi wote kushiriki kuwapa watoto chanjo ya Polio kwani ugonjwa huo ni hatari " nitoe wito kwa kina baba  wote kuwa mstari wa mbele kuwasaidia watoto kupata chanjo ya Polio kwani ni wajibu wa kila mzazi (baba na mama )na jamii yote kuwalinda watoto dhidi ya magonjwa ikiwa ni pamoja na Polio" amesema Bryason

Mwenyekiti wa Halmashauri ya Wilaya ya Meru Mhe.Jeremia Kishili ametoa wito kwa jamii kushiriki zoezi la chanjo ya Polio kuzuia  ulemavu wa viungo unaosababisha kupooza kutokana na ugonjwa wa polio

Naye Mkurugenzi Mtendaji wa Halmashauri ya Wilaya ya Meru Mwl.Zainabu Makwiya ametoa wito kwa jamii kuhimizana ili watoto wote wenye umri chini ya miaka 5 wapate chanjo hiyo.

Ikumbukwe Halmashauri ya Wilaya ya Meru inatarajia kutoa chanjo ya Matone ya Polio kwa watoto elfu 56,591