MAKAMU WA RAIS ATANGAZA NEEMA KWA WANANCHI WA MERU

Imewekwa: May 18th, 2023

Makamu wa Rais wa Jamhuri ya Muungano wa Tanzania Mhe.Dkt.Philip Isdor Mpango atangaza neema kwa wananchi  wa Meru, ambapo amesema Serikali itatoa magari  matatu zikiwemo  gari mbili za kubebea wagonjwa sambamba na kupanga watumishi  wasiopungua 25 wa  afya wakiwemo madaktari  kwa ajili ya kuwahudumia wananchi katika Halmashauri  ya Wilaya  ya  Meru.

Dkt Mpango amesema  hayo baada ya kuzindua jengo la huduma  za  dharura (EMD) katika Hospitali  ya  Wilaya  ya  Meru Wilayani  Arumeru, ampapo Serikali  ilitoa Milioni 300 za ujenzi  wa jengo hilo na milioni mia 509  za Vifaa tiba zikiwemo mashine za kisasa .

Aidha, Dkt.Mpango ametoa wito kwa watumishi wa afya hususani wa Kitengo  cha huduma za dharura  kuwahudumia wananchi kwa  ufanisi, weledi na kujitoa kwani  mgonjwa  anapokuwa mahututi hupata faraja kwa namna anavyohudumiwa.

Vilevile Dkt. Mpango amewataka watumishi kulinda na kutunza  miundombinu iliyopo kuleta tija zaidi ikiwa ni pamoja na utunzaji wa mazingira ya hospitali na  kudhibiti  ubadhirifu wa  dawa  ili wananchi waweze kunufaika na kazi kubwa inayofanywa na Serikali ya awamu ya sita chini ya uongozi shupavu wa Mhe.Dkt.Samia Suluhu Hassan, Rais  wa  Jamhuri  ya  Muungano  wa  Tanzania .

Kuhusu changamoto kubwa ya Barabara  katika Halmashauri  hiyo Dkt.Mpango ameielekeza  Ofisi ya Rais  Tawala  za  Mikoa  na  Serikali  za  Mitaa (TAMISEMI)  kupitia Wakala wa Barabara  Mjini na Vijijini (TARURA) kuona uwezekano wa kukarabati  barabara  za Halmashauri  hiyo .

Awali, Mkuu wa  Wilaya  ya  Arumeru  Mhe.Emmanuela  Kaganda  kwa niaba ya Wananchi  wa Meru amemshukuru  Rais Dkt.Samia  Suluhu  Hassan  na  Serikali  yake kutoa fedha nyingi za maendeleo katika Halmashauri  ya  Wilaya  ya  Meru  zikiwemo Bilioni 1.9  za  uboreshaji  sekta  ya  Elimu na  Afya, Bilioni 1.6 za kurasimisha ardhi na Milioni 550  fedha za tozo kwa ajili ujenzi wa kituo cha afya Mareu na ukamilishaji wa vyumba vinne vya madarasa katika Shule za Sekondari  umoja Kingori na Muungano.