MKURUGENZI MERU AWAPONGEZA AMBURENI

Imewekwa: September 12th, 2021

Mkurugenzi Mtendaji wa Halmashauri ya Wilaya ya Meru Mwl.Zainabu Makwinya awapongeza Wananchi wa Kata ya Ambureni kwa ujenzi wa Vyumba vinne (4) vya Madarasa  vya Shule ya Sekondari inayotajiwa kuanzishwa January 2022  .

Mwl.Makwinya ametoa pongezi hizo  wakati wa  muendelezo wa ziara yake ya  kukagua na kutembelea miradi ya maendeleo kuona uhalisia , ambapo  ameahidi Halmashauri kuunga Mkono jitihada za wananchi kwa  kutoa vifaa vya upauzi ikiwemo mbao na bati na kuelekeza ujenzi wa vyoo vya wanafunzi na walimu kuanza mapema .

Vilevile  Mwl.Makwinya amempongeza Diwani wa Kata hiyo Mhe. Faraja Maliaki  pamoja na viongozi wote wa Kata hiyo kwa kushiriki na kuhamasisha Wananchi Kujiletea maendeleo kwani  Kata ya Ambureni  ni miongoni mwa Kata mbili (2) za Halmashauri ya Wilaya ya Meru zisizo na Shule za Sekondari.  "Nawapongeza Wana Ambureni  hakika kazi iendelee"amesema Makwinya.

Kwa upande wake Diwani wa Kata hiyo Mhe.Faraja Maliaki amewashukuru wadau na Wananchi kwa michango yao  kwenye ujenzi wa Shule hiyo. Pia ameishukuru Halmashauri kwa ahadi ya vifaa vya upauzi na kuomba jitihada za kuhakikisha Shule hiyo inasajiliwa mapema kufanyika kwani wanafunzi wanatembea umbali mrefu kwenda Shule za Kata nyingine.

Aidha, Kata ya Ambureni ni Miongoni mwa Kata saba ambazo  Mkurugenzi Zainabu amefanya ziara ya kukagua  na  kutembelea utekelezaji wa  miradi ya EP4R ,Miradi ya Nguvu za wananchi na michango ya wahisani,miradi ya TASAF pamoja na maboma ya mda mrefu ,ambapo aliambatana na Afisa Elimu Sekondari  pamoja na Wahandisi wa Ujenzi toka  Halmashauri.

Mkurugenzi Mtendaji wa Halmashauri ya Wilaya ya Meru Mwl.Zainabu Juma Makwinya ( katikati)akiwa na Diwani wa Kata ya Ambureni Mhe.Faraja Maliaki pamoja na viongozi wengine wa Kata hiyo. 

Ujenzi wa Vyumba vinne (4) vya Madarasa vya Shule ya Sekondari  inayotajiwa kuanzishwa January 2022 katika Kata ya Ambureni.