MKUU WA WILAYA YA ARUMERU AWATAKA MADIWANI KUSIMAMIA MIRADI KWENYE MAENEO YAO

Imewekwa: May 2nd, 2023

Mkuu wa Wilaya  ya Arumeru  Mhe. Emmanuela  Kaganda ametoa wito kwa Madiwani wa Halmashauri ya Wilaya ya Meru, Wilayani  humo kusimamia kwa karibu utekelezaji wa miradi ya maendeleo kwenye maeneo ili miradi hiyo kuwa na tija .

Mhe.Kaganda  amesema hayo wakati wa Mkutano wa baraza la Halmashauri hiyo, ambapo amesema Serikali ya awamu ya Sita ikiongozwa na Dkt.Samia Suluhu  Hassan, Rais  wa  Jamhuri ya  Muungano  wa Tanzania  imeweka jitihada kubwa katika kuwaletea wananchi maendeleo  kwa kuboresha  miundombinu  katika sekta za Elimu, Afya,Maji nk.

Mhe.Kaganda amesisitiza  Madiwani hawana budi kusimamia maendeleo hayo ya Serikali kwa karibu ambapo amebainisha hivi karibuni  Serikali ya awamu ya sita imetoa fedha  Milioni 961.5  za Mradi wa BOOST  kwa ajili ya Ujenzi na ukarabati wa miundombinu katika shule za msingi na zaidi ya  Milioni 615  imetolewa kwa ajili  ya  ujenzi wa miundombinu ya kidato cha 5 na 6 shule ya Sekondari Makiba.

Aidha ,Mhe.Kaganda amesema sambamba  na  usimamuzi wa miradi, Madiwani wanapaswa kuhakikisha wananchi wanahudumiwa ipasavyo katika ofisi za kiijiji na Kata  ikiwa ni pamoja na kusomewa taarifa za mapato na matumizi katika mikutano  ya hadhara kwa wakati.

Mheshimiwa  Kaganda ameipongeza Halmashauri  ya  Wilaya  ya Meru kupata hati Safi kwa mwaka wa Fedha 2021/2022 ambapo amewataka waheshimiwa madiwani na wataalamu  kuendelea  kushirikiana kuiletea  Halmashauri hiyo maendeleo sambamba.

Mwisho, Mhe Kaganda amewataka Waheshimiwa  Madiwani  na Wataalamu kuweka nguvu katika kujibu hoja  za Mkaguzi Mkuu wa hesabu  za Serikali (CAG) kwa wakati na usahihi.

Kwa upande wao  madiwani wa Halmashauri hiyo wamewahakikishia wananchi wataisimamia vyema Halmashauri hiyo kwa maendeleo  ya kizazi cha sasa na cha kesho " sisi Meru tunashirikiana vyema na Ofisi ya Mkuu wa Wilaya na viongozi wengine  kuhakikisha tunafanya vizuri na kuwaletea wananchi maendeleo"  amesema Mhe.Felista Nanyaro Makamu mwenyekiti wa Halmashauri ya Wilaya ya Meru.