MKUU WA WILAYA YA ARUMERU AWATAKA WAFANYA BIASHARA SOKO LA TENGERU KUHAKIKISHA WANAHESABIWA

Imewekwa: August 17th, 2022

Mkuu wa Wilaya ya Arumeru Mhandisi Richard Ruyango ametoa  wito kwa wafanyabiashara wa soko la Tengeru katika Halmashauri ya Wilaya ya Meru kuhakikisha wanahesabiwa katika Sensa ya watu na Makazi itakayofanyika tarehe 23 Agosti 2022 ambapo makarani wa Sensa watapita kwenye kila kaya kuhesabu watu.

Aidha ,Mhe Ruyango amesema sensa ina manufaa makubwa kwani Serikali itatumia takwimu za sensa  kwenye kupanga na kuboresha huduma za kijamii kama vile uboreshaji wa miundombinu ya  masoko, vituo vya huduma za afya nk "nimekuja hapa sokoni niwakumbushe kutoa taarifa sahihi zitakazoisaidi Serikali kupanga mipango ya maendeleo kwa kuzingatia idadi halisi ya watu" amehimiza Ruyango

Mtakwimu Ismail Issa ambaye ni Mratibu wa Sensa Halmashauri ya Wilaya ya Meru amesema watu watakao hesabiwa siku ya  sensa  tarehe 23 Agosti 2022  ni wale wote  waliolala  hapa nchini usiku wa kuamkia tarehe 23 Agosti 2022  hivyo ametoa wito kwa wakuu wa Kaya kuwa na taarifa za watu wote waliolala kwenye kaya zao usiku wa kuamkia siku ya sensa.

Bw.Hamisi Juma mwenyekiti wa chama cha siasa cha  CUF Meru ambaye ni mwenyekiti wa chama cha CUF ametoa wito kwa wananchi wa vyama vyote vya Siasa  kushiriki zoezi la Sensa tarehe 23 Agosti 2022  ili Nchi ipate takwimu sahihi zitakazotumika kuleta maendeleo "maendeleo hayana chama hatuna budi kushiriki zoezi hili la Sensa  kwa kutoa taarifa sahihi "amehimiza Hamisi

Wakizungumza kwa nyakati tofauti wanawake wafanya biashara wa soko la Tengeru wameipongeza Serikali kwa namna inavyohakikisha  Elimu ya Sensa inawafikia  wananchi katika maeneo yao na kuahidi kuhakikisha wanashiriki maendeleo ya nchi kwa kuhesabiwa katika zoezi la sensa " sisi kinamama tupo tayari kuhesabiwa na tunawasihi wengine wote kushiriki zoezi la sensa " amesema Grace Akyoo

SENSA KWA MAENDELEO JIANDAE KUHESABIWA

Mkuu wa Wilaya ya Arumeru Mhandisi Richard Ruyango akizungumza na wafanyabiashara katika soko la Tengeru