SEMINA KWA WAJUMBE WA BARAZA LA KATA YA LEGURUKI NA MARUVANGO

Imewekwa: May 8th, 2017

Semina ya uelewa juu ya uendeshaji wa Mabaraza ya Kata ambayo kwa mujibu wa sheria yana nguvu mbili kisheria ambayo ni nguvu shurutishi na  nguvu suluhishi imefanyika leo katika ofisi ya kata ya Maruvango  washiriki wakiwa ni wajumbe wa mabaraza ya kata toka kata ya Leguruki na Maruvango.

Semina hii imeandaliwa na Ofisi ya Mkurugenzi Mtendaji wa Halmashauri ya Wilaya ya Meru kupitia kitengo cha Sheria na kuwasilishwa katika kata hizi na mwanasheria  Prosper Ndomba ambaye amesema zoezi hili la utoaji semina kwa Mabaraza ya Kata linaendelea kufanyika kwa kata zote ,Wajumbe wamekiri  kupata uelewa mkubwa juu ya uendeshaji wa Mabaraza hayo wenye lengo la kupunguza  migogoro isiyo ya lazima. 

Mjumbe Zakaria I. Akyoo alitoa angalizo kwa kuhoji ``Halmashauri  ina mpango gani kuhakikisha chombo hichi kilichoundwa kwa mujibu wa sheria hakidhaliliki kwa kukosa hata chumba cha ofisi" tena kujibiwa kwa kufafanuliwa kuwa Afisa mtendaji wa kata ndiye mratibu wa Mabaraza hayo kwa ngazi ya kata husika hivyo ataratibu maswala kama hayo.

Naye Mheshimiwa Diwani wa kata ya Maruvango  Samwel I. Nnko amewasihi wajumbe wa Mabaraza hayo ya kata kufanya kazi kwa kuzingatia sheria na kutozingatia mengine kama vile undugu,Diwani huyo amewashauri wajumbe hao kutii mamlaka za juu.