WAJASILIAMALI WADOGO HALMASHAURI YA WILAYA YA MERU WANUFAIKA NA VITAMBULISHO VYA RAIS MAGUFULI

Imewekwa: May 14th, 2019

Wajasiriamali wadogo  Halmashauri  ya Wilaya ya Meru, Wilayani Arumeru wamshukuru Rais wa Jamhuri  ya Muungano wa Tanzania, Mhe.Dkt.John P. Magufuli kwa kutoa vitambulisho maalum kwa ajili yao.

Wakizungumza na mwandishi wetu Wajasiliamali hao wamesema, Vitambulisho hivyo vimekuwa msaada mkubwa kwao katika kufanya biashara zao.

Kwa upande wa Thadeo  fundi  viatu kutoka Kata Usa - River  amemshukuru  Rais Magufuli kwa kutoa vitambulisho hivyo vinavyowarahisishia kufanya biashra zao bila   kupata usumbufu wowote "tunajivunia kufanya biashara tukiwa tunatambulika ni heshima na tupo salama kufanya biashara sehemu yoyote "amesema Thadeo.

Aidha Thadeo ametoa wito kwa Wajasiliamali wadogo wanaokwepa kuchukua vitambulisho hivyo kuacha tabia hiyo  ili waweze kufanya  biashara bila usumbufu.

Naye Vumilia shoo muuza matunda maeneo ya Leganga amesema vitambulisho hivyo vimekua fursa tosha kwa  wanawake kujikwamua kiuchumi kwa kufanya biashara bila usumbufu wowote .

Vumilia amesema  kwa sasa wanapata faida kubwa tofauti na awali ambapo  walikuwa wakifukuzwa  wanapopanga bidhaa zao maeneo mbalimbali  hivyo kupoteza muda  mwingi kujificha badala ya kufanya biashara.

Sambamba na hilo wajasiriamali hao wameiomba Halmashauri kupitia Idara husika kuendelea kutoa elimu ya Biashara  kwa wajasiriamali wadogo ili waweze kukuza mitaji yao.

Naye Mkurugenzi Mtendaji wa Halmashauri ya Wilaya ya  Meru Ndg. Emmanuel Mkongo amewaasa  watendaji wa Kata na Vijiji kutotumia fedha za Vitambulisho vya wajasilimali wadogo kwenye matumizi yoyote bali kuwasilisha fedha hizo ofisi husika.

Pia Mkongo amesema Halmashauri ya Wilaya ya Meru  imerahisisha zoezi la utoaji Vitambulisho vya wajasiliamali wadogo kwa kuwapelekea maeneo yao ya biashara.
Ikumbukwe kuwa, Tarehe10 Disemba 2018, Rais wa Jamhuri ya Muungano wa Tanzania,Mhe.Dkt John Pombe Magufuli alitoa vitambulisho maalum kwa ajili ya Wajasiliamali  wadogo na kuelekeza  kuchangia gharama za utengenezaji wa vitambulisho hivyo kiasi cha tsh 20,000 tu ambapo watafanya biashara zao kwa uhuru kwa mwaka mzima.