WAKULIMA WAKUMBUSHWA KUZINGATIA KIPIMO

Imewekwa: November 13th, 2021

Wakulima wa Halmashauri ya Wilaya ya Meru wakumbushwa kuuza mazao yao bila kuzidisha  kipimo kinachotakiwa  ili uuzaji huo  kuwa na tija na  manufaa zaidi .

Akizungumza na mwandishi wetu ,Afisa kilimo Digna Masawe amesema Serikali ilishapiga marufuku  uuzaji wa mazao kwa kiasi kilichozidi maarufu kama rumbesa ili Kilimo kuwa na tija kwa mkulima .

Digna amehimiza ni muhimu kwa wakulima  kuwa mstari wa mbele kupinga rumbesa kwa kuungana na kuuza mazao kwa kipimo kinachotakiwa sambamba na kutoa taarifa za wanaoendeleza uuzaji wa rumbesa, "Serikali imeshazuia uuzaji wa mazao kwa rumbesa. Ni wajibu wa mkulima na mnunuzi   kufuata maelekezo hayo "amesisitiza Digna

Pia, Digna amesema katika Halmashauri ya Meru kuna vikundi na umoja wa Wakulima ambapo ametoa wito kwa Wakulima kujiunga kwenye umoja wa Wakulima unaojihusisha na uuzaji wa mazao ya Wakulima (Amcos) ili  waweze kuuza mazao yao kwa kilo ambapo amesema umoja wa Wakulima katika Kata ya Mbuguni Muvikiho umeweza kudhibiti Rumbesa kwani kwa sasa Wakulima wa umoja huo wanauza mazao yao kwa kilo.

Digna amesema Mkulima ana nafasi Kubwa kudhibiti Rumbesa ambapo amesema  Ngarenanyuki ni miongoni mwa Kata zenye vikundi vya Wakulima ambao wanapaswa kuwa wamoja kupinga uuzaji kwa kipimo kilichozidi  (Rumbesa), " Juma lililopita wataalam wa kilimo tulikuwa katika Kata ya Ngarenanyuki kutoa elimu juu ya maswala ya kilimo ikiwemo  kipimo Cha uuzaji  mazao ambapo tuliwakumbusha Wananchi kuepuka uuzaji wa mazao kwa kipimo kilichozidi ,hivyo nitoe Wito kwa Wananchi wa Ngarenanyuki kujiunga na Amcos ya Uwano  Moja" amesema Digna

Ikumbukwe baada ya Serikali kupiga marufuku uuzaji wa Rumbesa  Halmashauri ya Wilaya ya Meru ilishatoa elimu ya udhibiti wa ufungaji mazao kwa kipimo kilichozidi  pamoja na kuwaelekeza Viongozi wa ngazi za Kata na Vijiji kudhibiti Rumbesa kwenye maeneo yao.

Pia. Halmashauri Kupitia mawakala inakusanya tozo za mazao kwa kuzingatia maelekezo ya Serikali kuhusiana na kipimo.

Aidha,Halmashauri inatoa wito kwa Wakulima na Wananchi kwa ujumla  kutoa taarifa kwa Wataalamu wa kilimo Ngazi za Kata, Uongozi wa Kata, Vijiji na Wilaya juu ya wanunuzi  wa mazao na wakulima ambao bado wanaendeleza uuzaji wa mazao kwa kipimo kilichozidi maarufu  kama  rumbesa inayolenga kumkandamiza mkulima