WITO WATOLEWA KWA JAMII KUSHIRIKI KAMPENI YA UTOAJI WA CHANJO YA POLIO AWAMU YA TATU KUZUIA ULEMAVU WA VIUNGO KWA WATOTO

Imewekwa: August 30th, 2022

Mkuu wa Wilaya ya Arumeru, Mhandisi Richard Ruyango ametoa wito kwa wazazi na walezi kushiriki kikamilifu kwenye kampeni ya siku nne ya  awamu ya tatu ya utoaji chanjo ya matone ya  Polio kwa Watoto wenye umri chini ya Miaka 5 (0 -5) ili kuzuia ulemavu wa viungo unaosababishwa na ugonjwa wa Polio.

Akizungumza katika kikao cha uhamasishaji wa chanjo ya polio Halmashauri ya Meru, Mhe.Ruyango amesema Serikali kwa kushirikiana na wadau imeandaa chanjo na bajeti ya utekelezaji wa  wa awamu ya tatu ya utoaji chanjo ya  matone dhidi ya ugonjwa wa Polio  ili kuhakikisha watoto wote wa Kitanzania  wenye umri chini ya miaka mitano wanakuwa  Salama kwa kupata chanjo hiyo kwani ugonjwa wa Polio umeripotiwa katika nchi  jirani ya Malawi .

Vilevile Mhe. Ruyango ameipongeza Halmashauri ya Meru  kufanya vizuri katika utoaji wa chanjo hiyo awamu ya pili ambapo ilivuka lengo kwa asilimia 138% na kuwataka wataalum kuhakikisha katika awamu hii ya tatu  wanafanya vizuri zaidi kwa  watoto wote  chini ya miaka mitano kupata chanjo ya Polio " nitoe wito kwa wataalam watakao toa chanjo kuhakikisha wanawafikia watoto wote  wenye   umri chini ya miaka mitano " ameagiza Mhe.Ruyango

Mratibu wa chanjo halmashauri ya Meru , Salome Mbegela amesema utoaji  wa chanjo ya Polio awamu ya tatu utafanyika kwa siku nne kuanzia tarehe 01 hadi 04 Septemba 2022 ambapo chanjo hiyo ya matone itatolewa kwa watoto wote wenye umri nchini ya miaka mitano nyumba kwa nyumba  ,vituo vya  kutoa huduma za afya,vituo vya kulelea  watoto , katika shule nk

Dkt.Focus Maneno ambaye ni Mkuu wa Idara ya huduma za Afya, Lishe na ustawi wa jamii amesema chanjo ya Polio ni muhimu sana kwani  ugonjwa wa polio unasababisha mtoto kupooza na kupata ulemavu wa viungo .

Mshili Mkuu wa Meru Ezron Sumari amesema chanjo ya ugonjwa wa Polio ilikuwa toka miaka ya nyuma hivyo ametoa  wito kwa Wananchi wa Meru kutoa ushirikiano katika zoezi la chanjo ya Polio ili watoto wawe salama.

Kwa upande wao Viongozi wa dini waliohudhuria kikao hicho wametoa wito kwa jamii kuhakikisha watoto walengwa wanapata chanjo hiyo muhimu ambapo  Mchungaji Exaud Nnko amesema  ulemavu na kupooza kwa watoto ni janga la jamii nzima hivyo jamii haina budi kuzuia janga hilo kwa kuhakikisha watoto chini ya miaka mitano wanapata chanjo.

Aidha, watoto elfu 56,591  wenye umri chini ya miaka 5 wanatarajia kupata chanjo hiyo

Mkuu wa Wilaya ya Arumeru, Mhandisi Richard Ruyango wakati wa kikao

Mshili Mkuu wa Meru Ezron Sumari wakati wa kikao

Wadau  wakati wa kikao