ZAO LA PARETO LAWATOA USINGIZINI WANANCHI WA KISIMIRI JUU.

Imewekwa: February 13th, 2024

Na. Annamaria Makweba

*ZAO LA PARETO LAWATOA USINGIZINI WANANCHI WA KISIMIRI JUU.*

Wananchi wa Kijiji cha Kisimiri Juu Kata ya Uwiro katika Halmashauri ya Wilaya ya Meru wameamka usingizini na kujitokeza kwa wingi kujiandikisha kupokea miche ya zao la Pareto na kuachana na kulima zao la Bangi ambalo limekuwa likileta athari kwa watumiaji na kupoteza nguvu kazi ya Taifa.
Katika makabidhiano ya Miche ya Pareto kwa Wakulima wa Kijiji hicho Mkuu wa Wilaya ya Arumeru Mhe. Emmanuela Mtatifikolo Kaganda amewapongeza wananchi wa kijiji cha Kisimiri juu kwa kujitokeza kwa wingi na kukubali kuachana kabisa na Kilimo cha Bangi na badala yake kulima zao la Patero kama zao la Biashara.

"Kwenye heka moja ya zao la Pareto Mkulima anaweza kutengeneza siyo chini ya shilingi Milioni 2 kwa msimu mmoja, hivyo kwa mkulima mwenye heka 5 anaweza kupata Fedha shilingi Milioni 10, hivyo zao la Pareto litawafanya mfanye biashara ya halali bila kukimbia kimbia lakini pia mtaishi kwa Amani" Alisema Kaganda.

Aidha, Mkuu wa Idara ya Fedha na Mwakilishi wa Kampuni ya Pareto Tanzania ( Pyrethrum Company of Tanzania PCT) Gerald Joseph ameeleza kuwa Kampuni hiyo imeanza kuzalisha miche ya Pareto katika kitalu chake kilichopo Oldonyosambu Kata ya Oldonyowasi Wilayani Arumeru na kitalu hicho kina jumla ya ekari 6 ambapo kila ekari moja  ya Kitalu ina uwezo wa kupanda miche ekari 45 hadi 50.

Vilevile ameeleza kuwa Miche ya zao la Pareto inatolewa bure kwa wakulima wote wanaojitokeza kujiandikisha lakini pia, zao la Pareto ni zao bora kwani halihitaji mbolea, kazi ni kupānda, kupalilia,  kuchuma, kuanika na kusubiri kwenda kuuza.Hivyo Pareto ni Pesa, Pareto ni Maisha " alisema Bw. Gerald.

Hata Hivyo, Afisa Mtendaji wa Kijiji cha Kisimiri Juu Emmanuel P. Nnko ametoa shukrani kwa Serikali ya Jamhuri ya Muungano wa Tanzania kwa kuanza kuifanyia kazi changamoto ya barabara kwani ufunguzi wa barabara ya Mkuru Kijiji cha Uwiro imeanza kuchongwa kwa Km 4 ambapo itawasaidia wakulima wa Kisimiri kusafirisha mazao yao kwa urahisi.

Mhe. Kaganda ameahidi kufuatilia Km 4. zilizobaki za kuchonga barabara hiyo kwa tathmini ilikuwa ni Km 8 na Km 4 tayari zimechongwa.

Zaidi ya wananchi 90 wa Kijiji cha Kisimiri Juu wamejiandikisha kupewa Miche ya Zao la Pareto kupanda kwenye mashamba yao.

KISIMIRI BILA BANGI INAWEZEKANA.